شاهد: عفاف شعيب تردّ بقوة: الراجل راجل والست ست

ردّت الفنانة عفاف شعيب على تريند "الزوجة مش ملزمة بحقوق تجاه زوجها" والذي تبنّاه الكثير من المشاهير منتقدين اهتمام المرأة بزوجها ومنزلها، وأثار جدلاً واسعاً خلال الأيام القليلة الماضية. وقالت شعيب خلال حلولها ضيفةًً على برنامج "البخت" المذاع على قناة "الشمس" الفضائية: "الله يسامحكم كده بتخربوا البيوت، إيه الكلام الفاضي ده ويا جماعة عيب، اللي بيتكلموا دول دارسين إيه؟ فهموا دينهم كويس؟ المرأة ليها حقوق والراجل له حقوق، سبحوا وهتقوموا تلاقي الملائكة شيلاكم وبتساعدكم".

وأضافت: "قعدت مع أمي 3 سنين في أمريكا أنا اللي بخدمها، هناك مفيش خدامة مقيمة، بيجوا كام ساعة بس، والساعة بتاعت الخدم غالية والعلاج كان غالي ساعتها، كنت أنا اللي بنضف وبكوي وأغسل وكنت ماشية بتسابيح ربنا مكنتش بحس بحاجة أبداً".
وأشارت عفاف شعيب إلى أن ذلك التريند ما هو إلا أجندة وخطة يتم تنفيذها لمصالح الغرب، حيث قالت: "نسب الطلاق عالية عشان مفيش حد يوجههم والبرامج الدينية انقرضت تماماً، الأول كنا بنسمع الشيخ الشعراوي وجاد الحق ومحمد الغزالي، عندنا أزمة أخلاق ودين للأسف، ارجعوا لرشدكم وكتاب الله وسنّة الرسول الحبيب".

وعن طلب بعض السيدات أن تكون العصمة الزوجية في أيديهن، قالت شعيب: "العصمة لازم تكون في أيد الراجل، هي الدنيا انقلبت، أنا ماشيه بتعاليم ربنا وسنّة الحبيب محمد، فين الرجولة طالما العصمة هتكون في إيد الست؟ هتبقى كارثة، يعني نقوله قوم امشي اطلع برا... أنت طالق؟". وأضافت: "أعرف ستات كتير متجوزة وللأسف بتخون أزواجها ومن رأيي تروح تقول لجوزها خلاص كده كفاية... لكن تروح تخونه وتقول متمسكة بيه، إيه البجاحة دي وقلة الأدب؟".
أما عن إمكانية ارتدائها الباروكة في أعمالها، فقالت: "مش هلبس باروكة في أي عمل وده اسمه تحايل على الدين وماليش دعوة بغيري هما أحرار وهما هياخدوا الوزر مش أنا، فيه ناس نصحوا واحدة اعرفها وشيوخ قالوا لها عادي، الذنب مش عليها الذنب على اللي إداها الفتوى".
وعن إمكانية تجسيدها سيرة الفنانة الراحلة شادية في عمل فني، قالت عفاف شعيب: "شادية هو فيه حد زي شادية، جميلة الجميلات، دي بقى الأسطورة... لا مش هوافق طبعاً، مفيش شبه كبير بيني وبينها وكانت بتحبني جداً وفيه تواصل بيني وبينها وصعب إني أعمل ده".