فيديو: أزمة تتصاعد في مصر بسبب حسن شاكوش!

تشهد نقابة المهن الموسيقية في مصر أزمة حقيقية بعد الإعلان مؤخرا عن عودة مؤدي المهرجانات حسن شاكوش لمزاولة مهنة الغناء بتصريح رسمي، حيث خرج الفنان حلمي عبد الباقي عضو مجلس إدارة النقابة ليؤكد عدم عرض ملف الأزمة على المجلس، ملمحا لوجود أخطاء في القرار، وتضامن معه زميله في المجلس عاطف إمام، بينما أكد المستشار القانوني للنقابة أن الأعضاء بالكامل وقعوا على قرار قبول التماس شاكوش.

حلمي عبد الباقي خرج بالأزمة بعيدا عن جدران نقابة المهن الموسيقية في مصر وتوقع مبكرا أن يتعرض لأزمة بعد الظهور في بث مباشر عبر حسابه بموقع الفيس بوك للحديث عن ملابسات منح حسن شاكوش تصريحا بمزاولة مهنة الغناء في مصر بعد 10 شهور من إيقافه، مشيرا إلى أنه لم يعلم بقرار عودته إلا من خلال السوشيال ميديا فقط، موضحا أن مجلس النقابة لم يناقش عودة شاكوش خلال الفترة الماضية، حيث تقدم بالتماس فقط، وتلك كانت أحدث معلومات المجلس.
وقال عبدالباقي أنا اللي اخترت لجنة الخدمات بنقابة المهن الموسيقية وراضي تماما باللي أنجزته خلال فترة عملي باللجنة، وبكل الأمانة كنت بخدم الناس كلهم، الكبير قبل الصغير والمعاش قبل العامل.

وأضاف: أكثر من مرة فكرت اني أتقدم باستقالتي، ولكن كل اللي خلاني أرجع في كلامي، إنني كنت بفكر اللي بعدي مش هيعرف يشتغل نص الشغل اللي بعمله في النقابة ومش ببالغ نهائي، وتابع قائلا: هتكلم في الموضوع اللى قالب الدنيا والسوشيال ميديا وهو حسن شاكوش، في اجتماع المجلس اتقدم التماس من شاكوش بواسطة لجنة التحقيقات عشان ياخد العفو وكفاية 10 أشهر.
وتابع: تناقشنا في المجلس وقولنا مش هنعطي قرار في الموضوع ده تماما، وده معظمنا وقولنا مش هنتناقش غير في انعقاد المجلس القادم، قيل لي إن في بيان مكتوب من الشؤون القانونية إن مفيش حرمان مدى الحياة ولو سمحت امضوا على كدا، وقالوا إن أنت مش هتمضي غير إن مفيش حد هيحرم مدى الحياة، وليس عودة حسن شاكوش، ومضينا أنا والمجلس على ذلك الأساس، وهو قرار عن عدم حرمان أحد مدى الحياة.
واستطرد: لو أنا بقول كلام كدب يطلع اللي قالي كده يقول إني كداب، قولنا يا جماعة لو الموضوع يخص شاكوش لازم نرجع، ونعقد مجلس عشان نتكلم في رجوع الشخص ده، وأنا عارف إن البيان ده عشان أزمة شاكوش، أما يا جماعة هنعمل مجلس قبل رجوع شاكوش.

وتابع: وكل حرف بقوله أنا مسؤول عنه وانا عارف اني ممكن يحصلي مشكلة ولكن كل الكلام ده لا يعنيني ومستعد حالا أقدم استقالتي وده لن ينقص مني شي، وانا بقول الحقيقة واللي عنده عكس كدا يخرج يقول اني كداب.
وأوضح: بعد كدا من كام يوم كنت موجود في النقابة وبعض أعضاء المجلس وبعدين خلص ميعادنا وروحت، في البيت لقيت الأخ حسن شاكوش طالع بصورة من النقابة وبيقول أخذت الكارنيه، مين اللي اعطاله الكارنية من غير المجلس ولا اجتماع أنا معرفش، واقسم بالله إن كلامي ده بالكلمة.
واختتم: أنا مش ضد أي حد لكن كان لازم يكون في شكل قانوني للموضوع ولازم تترد الإهانة لإخوتنا الموسيقيين، وكل الكلام ده على الملأ ومصر كلها تشوف، وكلامي ده مش عايز اقطع عيش حد، ولكن الناس اللي اتهانت دي لازم تتراضى ويكونوا موافقين من قلبهم، وده اللي كنت عامل حسابه وده بكل اختصار اللي حصل.